:) يااااه اول مرة اكتب بالعربي في المدونة بتاعتي
بس المرة ده انا بتكلم مع الشعب المصري كله فعشان كده انا اخترت اللغة العربية بل بالاخص اللغة العامية عشان نفهم بعضينا. بس ايه رايكم في العنوان ده؟؟؟ غريبة شوية مش كدة؟ الفترة اللي احنا فيها دلوقتي هي فترة انتقالية لمصر الحبيبة بعد ثورة 25 يناير اللي مكانش حد يتوقعها وربنا قدرنا وغيرنا النظام بتاع الحكومة.. ده شئ رائع بصراحة!
بس فيه حاجة كلنا ناسينها, عارفين ايه ؟؟؟
كده بقى اقدر اتكلم على الثورة الل مفروض كلنا نعملها وهي الثورة الذاتية
اللي انا ملاحظو ان الشعب المصري زي ما هو ماتغيرش وشوفوا الامثلة اللي شوفتها بعد الثورة:
- شوفت واحد كان بياكل ساندويتش وبعد ما خلص رمى ورقة الساندويتش على الارض!
- شوفت ناس كتييييير بيسوقوا العربيات عكسي وبيقطعوا اشارات.
- لقيت واحد بيشتم واحد شرطة في اشارة مرور!! مش دول برضو في خدمة الشعب وخلاص فتحنا صفحة جديدة؟!
- لسة فيه سرقة.
- لسة فيه خيانة أمانة.
- لسة فيه عدم تطبيق الدين صح.
- لسه في ناس مش بتحترم بعضها.
- ولسه ولسه ولسه ولسه!!
طب دلوقتي كل عناصر الفساد راحوا فين؟ هم مش دلوقتي في السجن رغم ان هم قبل كدة من الشخصيات المهمة في البلد؟ واستغربت من بعض الناس يقوللي ايه: انا فرحان قوي ان ربنا خلصنا من الحرامية دول ونفس الشخص تلاقيه بيشتغل من غير ضمير ومن غير أمانة في الشغل وسلوكياته يعلم بيها ربنا, طب ما يصلح نفسه عشان ما يبقاش هو كمان من عناصر الفساد!
سالت نفسي لييه! وفكرت كتييييير فبفكري ووجهة نظري المتواضع لقيت ان الشعب المصري جاهل دينيا و جاهل من ناحية المبادئ والاصول ومش عارف ليه؟! طبعا مما لا شك فيه ان المفروض المدارس ليها دور بس للاسف الشديد المواد الدينية مش بتتضاف على المجموع وكمان مختصر جدا يا دوب كام كلمة وخلاص. وكمان المدارس اللي بتعلم الاتيكيت مدارس الراهبات بس وباقي المدارس في الكنافة وطبعا اغلبية الابهات والامهات في الطراوه عشان انهماكهم في الشغل حتى الام الي بنقول عليها مربية بقت بتنزل الشغل وتسيب عيالها عند جدتهم وطبعا اعز الولد ولد الولد فهيبقى فيه دلع وبوظان, او توديهم حضانة وطبعا يتعلموا حاجات وسلوك زي الفلللللل. أو تكون الام ست بيت بس ما بتزرعش القيم ولا الدين ولا المبادئ في ولادها مافيش عيب يا ولد وعيب يا بنت, مافيش حرام يا ولد وحرام يا بنت, فين دوركم يا امهات ويا أباء؟!! ماشي مش مشكلة, الولاد كبروا وناقصهم مبادئ وقيم ودين ااااااااااد كده.
طب احنا يا شباب عايزيين نزرع في نفسنا القيم والمبادئ ده وكمان نعرف دينا كويس سواء كنا مسلمين او مسيحيين طبعا من غير تعصب واتباع جماعات متعصبة, احنا عايزين نعرف الحلال ونعمله ونعرف الحرام ونسيبه عشان نعيش راضيين ربنا وندخل الجنه ان شاء الله وكمان دينا هيعلمنا طبعا معظم القيم والمبادئ.
دلوقتي ولله الحمد فيه وسائل كتييره تعلمنا الحاجات الجميلة ده منها طبعا الانترنت, يعني بدل ما نضيع وقت على الفيسبوك وتشييت البنات مع الولاد ونتفرج على هيافات ليه ما نقسمش وقتنا للحاجات ده وكمان نثقف نفسنا دينيا ونعرف المبادئ ونثقف نفسنا ونتعلم فن التعامل مع الناس, ده الانترنت ملياااااان مواقع تعلمنا الحاجات ده بس للاسف بنقضيها فيس بووك وتشييت وهيافات طول الوقت وبنستخسر في نفسنا وقت صغير نفيد نفسنا.
وكمان ربنا بعتلنا دعاه قدرو يجمعوا بين الدين وبين العصر اللي احنا فييه زي عمرو خالد ومصطفى حسني وناس كتيره غيرهم وسيبك من المشايخ المتعصبة عشان دينا يسر, برضو نفس الكلام للمسيحيين ان هم يروحو للي يفهمهم الدين بدون اي تعصب فياريت نقرألهم ونحضر دروسهم.
كمان ممكن ننضم للجمعيات اللي بتطلب متطوعين للاعمال الخيرية عشان اصلا الناس والزملاء هناك بيزرعوا في بعض السلوك الحسن والدين والقيم والمبادئ.
شوفتو يا شباب؟ اديكوا عرفتوا ازاي تطوروا نفسكم وتبقوا ناس جميلة في مصرنا الحبيبة وتبقى عيييبه قوي ان احنا عارفين دينا ومبادئنا بس ما بنطبقهاش!!!!
يا ريت زي ما بنتعلم من الغرب اللبس والموضة اللي بتخالف دينا ومبادئنا كناس شرقيين نتعلم منهم النظام والسلوك الكويس والحفاظ على النظام والأتيكيت, كفاية ان رأي اغلبية البلاد التانية فينا ان احنا شعب همجي متخلف ومش نظيف ومابيمشيش الا بالكرباك, مش آن الاوان نغير صورتنا؟!
هاه ايه رايكم في الكلام ده؟ مش آن الاوان نعمل ثورة ذاتية ونغير نفسنا؟ بايدكم يا مصريين تتغيروا وترفعوا راس بلدكم وبايدكم تفضلوا متخلفين أو تحصلوا المساجين اللي في طره.
فكروا كده وما حدش يقوللي (انت محبكها) عشان الكلمة ده بسمهعها كتير من الناس اللي بتتشنج لما انصح بعمل الصح وترك الغلط.
معلش التغيير صعب بس هنحس ان احنا ناس جميلة لما نتغير للاحسن, فيلا بينا نبتدي الثورة الذاتية......
No comments:
Post a Comment